Ньурба дьокутаата – Сергей Евсеев: Конституцияҕа уларытыыларга элбэх социальнай боппуруостар таарыллаллар

Саха Сирин бары муннуктарыгар Конституцияҕа уларытыылары ырытыы туһунан кэпсэтии үгүс. Элбэх экспердэр дойду Төрүт Сокуонугар уларытыылары, көннөрүүлэри киллэрэр наадатын ыйаллар. “БИИР НЬЫГЫЛ АРАССЫЫЙА” Баартыйа Ньурба улууһун олохтоох отделениетын сэкэритээрин солбуйааччыта, улуустааҕы дьокутааттар сэбиэттэрин бэрэссэдээтэлэ Сергей Евсеев дойду Төрүт сокуонугар уларытыылар тустарынан санаатын үллэстэр:

“Бэс ыйын 12 күнүгэр 1990 сыллаахха РСФСР судаарыстыбаннай суверенитетын туһунан декларация ылыныллыбыта. Оттон билигин үлэлиир РФ Төрүт сокуона 1993 сыллаахха ахсынньы 12 күнүгэр норуот куоластааһынынан ылыллыбыта. Быйыл от ыйын 1 күнүгэр биһиги бүттүүн тахсан РФ Төрүт сокуонугар киирэр уларыйыылга ылынабыт эбэтэр ылыммаппыт диэн куоласпытын биэриэхпит.

Төрүт сокуоҥҥа үгүс уларыйыылар киирээри тураллар. Бэйэм үлэлиир эйгэм өттүнэн этэр буоллахха, олохтоох салайыныы уорганыгар уларыйыылары көрбүттэр. Чуолаан публичнай былаас диэн өйдөбүлү киллэрэллэр. Ол курдук, судаарыстыбаннай былаас уорганнара, РФ, СӨ бырабыыталыстыбалара, Ил Түмэн уонна муниципальнай былаастар биир сыалга-сорукка үлэлиирбит туһунан этиллэр. Оччотугар биһиги, муниципаллар судаарыстыбаннай боппуруостарга кыттыһарбыт мэктиэлэнэр, үлэбит суолтата күүһүрэр. Билигин муниципальнай былаас боломуочуйата аҕыйах. Өскөтүн публичнай былаас киирдэҕинэ, судаарыстыбаннай суолталаах боппуруостары тэҥҥэ быһаарсабыт, ону кытта эппиэттээх буолабыт. Судаарыстыбаннай бүддьүөтү былаанныырга олохтоох салайыныы уорганын, дьокутааттарын этиилэрэ учуоттаныахтаахтар.

Маны таһынан, уларытыыларга элбэх социальнай боппуруостар таарыллаллар. Оҕо – кэскилбит диэн өйдөбүлүнэн быйыл оҕо аймахха туһаайан элбэх көмө оҥоһулунна.

Инникитин да саҥа Төрүт сокуон бу көмөлөрү мэктиэлиэ дии саныыбын.

Итиэннэ биэнсийэ сылын аайы индексацияланар буолар.

Ол курдук, от ыйын 1 күнүгэр дьон-сэргэ тахсан РФ Төрүт сокуонугар киирбит уларыйыылар иһин куоластыа диэн эрэнэбин”.