Карта сайта
12 сентября 2017, 10:55

Владимир Поскачин: «Киэн туттабын!»

Ааспыт быыбар түмүгүнэн чулуу көрдөрүүнү, үгэс курдук, Үөһээ Бүлүү улууһун баһылыга Владимир Поскачин ситистэ. Киниэхэ быыбардааччылар 77 бырыһыаннара куоластаатылар. Владимир Семенович кулубанан үһүс болдьоххо талылынна. Дьонугар-сэргэтигэр анаан махтал тылларын тиэрдэр:

- Үтүө-мааны үөһээ бүлүүлэр! Үөрэн, долгуйан, сүргэм көтөҕүллэн туран, бу дьыл балаҕан ыйын 10 күнүгэр буолбут олохтоох бэйэни салайыныы быыбарыгар көхтөөхтүк кыттан, куоласкытын миэхэ биэрэн “Үөһээ Бүлүү” муниципальнай оройуон баһылыгынан үһүс төгүлүн талбыккытыгар хас биирдиигитигэр барҕа махталбын тиэрдэбин! Хас биирдии киһи сарсыҥҥыта сырдык, кэрэ буоларыгар эрэнэр. Кэлэр биэс сылгытын  миэхэ итэҕэйбиккититтэн киэн туттабын. Үөһээ Бүлүүбүт чэчирии сайдарын туһугар саҕалаабыт үлэбин, туруоруммут сыалбын-сорукпун, Эһигини кытары биир сомоҕо күүс буолан ситиһиэм диэн сөллүбэттии эрэннэрэбин. Өлүөр буолуҥ, дьоллоох буолуҥ, инникигэ эрэллээх буолуҥ, күндү дьонум! Үөһээ Бүлүүбүт үтүө аата үйэлэргэ үүнэ-үрдүү турдун! Биһиги күүспүт – түмсүүгэ!

Дириҥ ытыктабылы, махталы кытта В.С.Поскачин

Ссылка для блогов