Карта сайта
12 сентября 2017, 10:57

Михаил Захаров: Өрүү бүгүҥҥүбүт курдук биир санаанан үлэлиэҕиҥ!

Убаастабыллаах истиҥник саныыр дьонум, ытык Өймөкөөн олохтоохторо!

Баһылык дуоһунаһыгар кандидатынан турарбар миэхэ куоласкытын биэрбиккитигэр ис сүрэхпиттэн барҕа МАХТАЛБЫН тиэрдэбин! Инники былааммыт үгүс. Улууспут 100 сылыгар аналлаах биһигини олус дириҥ ис хоһоонноох үлэ күүтэр. Мин кэлэр биэс сыллааҕы программабын улуус тэрилтэлэрин салайааччыларыттан саҕалаан министиэристибэлэргэ уонна биэдимистибэлэргэ тиийэ сүбэлэһэн, кыаллары-кыаллыбаты анаан толкуйдаан, ыйааһыннаан туран оҥорбутум.  Эһиги  миэхэ эрэлгитинэн кынаттанан, Өймөкөөн улууһа сайдыытыгар туох баар санаабын, толкуйбун, кыахпын анаан туран айыам-тутуом! Быйылгы быыбарга Өймөкөөн улууһун олохтоохторун сомоҕолоһуулара, биир санаалаахтара арылхайдык көһүннэ. Агитация кэмигэр баһылык дуоһунаһыгар турбут, күүстээх үлэни ыыппыт кандидаттар ылбыт тэтимнэрин ыһыктыбакка, уопсастыбаннай түмсүүлэри көҕүлээн, улууспут сайдыытыгар туһуламмыт өйгө-санааҕа киирэн, биһигини кытта бииргэ үлэлииргэ ыҥырабын. Ол буолуоҕа  Өймөкөөммүт  ытык аатын өрө тутууга дьулуһуубут дьоһуннаах көстүүтэ уонна бастыҥ холобура! КҮНДҮ БАР ДЬОНУМ, ӨРҮҮ БҮГҮҤҤҮБҮТ КУРДУК БИИР САНААНАН ҮЛЭЛИЭҔИҤ, САРСЫҤҤЫБЫТЫГАР ЭРЭЛЛЭЭХ БУОЛУОҔУҤ!             

Истиҥ махталы кытта Михаил ЗАХАРОВ.

Ссылка для блогов